Realeko autobusa herenegun hasi zen eskualdeko herrietan banderak jaso eta uzten. Atzo, Ikaztegietatik sartu, eta Tolosa, Ibarra, Leaburu-Txarama, Belauntza, Berrobi, Elduain, Berastegi, Irura, Anoeta eta Hernialde zeharkatu zituen. Gaur, berriz, Alkiza, Larraul, Asteasu, Zizurkil, Aduna eta Amasa-Villabonan egon da autobusa.
Harrera beroa egin diete herrietan autobusari, eta baita Realeko ordezkariei ere. Besteak beste, presidente ordea den Joseba Ibarburu eta jokalari ohia den Mitxel Loinaz egon ziren atzo herritarrekin. Loinazek hainbat sinadura ere utzi zituen eskualdean. Herri guztietan animoak jaso dituzte apirilaren 3an Athleticen aurka jokatuko duten Espainiako Kopako partidarako.