Ez du hutsik egin aurtengo martxoaren 8ak. Dena aldatu, sistema arrakalatu lelopean, mobilizazio jendetsuak egin dituzte iluntzean eskualdeko herrietan.
Sistema kapitalista, heteropatriarkala eta arrazista arrakalatzeko deia ozen oihukatu dute herriz herri. Emakumea bera eta kolore morea izan dira nagusi; pin, zapi, jantzi eta banderola moreak atera baitituzte kalera. "Geldirik nahi gaituzten arren, antolatuta segitzen dugu eta kaleak gure aldarri feministez betetzeko determinazioz", esan du mugimendu feministak. Besteak beste, zaintza sistema publiko bat eskatu zuten.
Besteren artean, Aiztondoko Mugimendu Feministak egitarau bateratua antolatu du gaurko egunaren bueltarako, eta manifestazio jendetsua egin dute, Zizurkildik abiatu eta Villabonarantz. Tolosan ere, asanblada feministak deituta, jendetza gerturatu da iluntzeko mobilizaziora. Besteak beste, Alegia, Altzo, Amezketa, Anoeta, Irura, Berastegi, Bidania-Goiatz, Ibarra eta Ikaztegietan ere elkarretaratzeak egin dituzte.