Binakako Pilota Txapelketaren hamargarren jardunaldia izan dute jokoan asteburuan, eta Erik Jakak eta Martijak bere bigarren garaipena lortu dute. 22-12 irabazi diote Ezkurdia eta Ladis Galarzari, baina oraindik sailkapeneko azken lekuan jarraitzen dute. Hala ere, seigarren postua lortzeko lehian daudela erakutsi dute asteburu honetan.
Iñaki Artola kantxara itzuli da, lesio batengatik zazpi jardunaldi jokatu gabe egon ondoren. Jon Ander Peñaren aurkako derbia zuen, eta irabaztea lortu du alegiarrak. Artola-Aranguren bikoak 22-13 irabazi zioten Peña II-Albisu bikoteari. Atzo gaueko partidaren zain, Artola-Aranguren seigarren postuan jarri dira, hiru garaipenekin, eta Peña II-Albisu hirugarren postuan daude, sei garaipenekin.
Jokin Altunak ere bere partida irabazi zuen, eta ez nolanahiko aurkarien kontra. Mariezkurrena II.arekin batera, amezketarrak 19-22 irabazi zien Elezkano II.ari eta Zabaletari. Sailkapeneko lehenengo bi bikoteen arteko lehia azkenean Altuna III-Mariezkurrena II bikotearentzat izan zen, eta berriro ere berdinduta geratu dira sailkapenaren puntan, bikote bakoitzak zortzi garaipen eskuratuta.
Promozio mailako txapelketan, Iker Elizegik eta bere aurrelari Arteaga II.ak beste partida bat galdu dute, eta, beraz, hamar jardunaldietan garaipen bakarra eskuratu dute. Oraingoan, Zubizarreta III-Uriondo bikotearen aurka galdu zuten 8-22. Hori horrela, sailkapeneko azken postuan jarraitzen dute Elizegik eta Arteaga II.ak.