Lehenengo aldiz jokatu dute Larrarte bidaniarrak eta Urkizu berastegiarrak elkarrekin, eta Urkizuk lehenengo aldia zuen pilota mistoarekin aritzen zela. Larrartek azaldu duenez, "bagenekien aurkari gogorrak genituela. Nahiz eta emaitzan alde handia ikusi, ni behintzat gustura aritu naiz. Markagailua ez bada ere gustukoa izan, jokoan pertsonalki hobetzen nola ikusten dut eta horrekin gustura geratu naiz". Urkizuk, bere aldetik, azaldu du "partida kaskarra" egin duela: "Pilotara jarri ezinik ibili naiz. Aurreneko aldia zen pilota mistoarekin, eta partida kaskar samarra izan da egia esan".
Estrategia pilota ezker paretara botatzea eta ahal zen bizien mugitzea zela adierazi du Larrartek. "Nahiz eta markagailuan alde aldia izan, partidan denbora guztian pentsatzen aritu naiz tantoa egin behar genuela. Psikologikoki, behintzat, ni ez naiz partida guztian jaitsi, baina ezin izan da. Erdialdean aukera gutxi batzuk izan ditugu baina ez ditugu aprobetxatu". Urkizuk urduri aritu dela azaldu du: "Hasieratik urduri ibili naiz eta pilotara ondo jarri ezinik, eta, orduan, hutsegite asko egin ditut, ikaraz, eta ez naiz gustura aritu".
Urkizuk aurretik pilota goxoarekin jokatu ditu txapelketak. "Aurten mistoarekin probatzeko eman nuen izena, eta zail samarra iruditu zait", esan du berastegiarrak. Larrartek gaineratu duenez, "Anek pilota mistoarekin entrenatu duenean, partidako pilotak baino motelagoak zirenekin entrenatu du, eta gero partidara etorri eta horrelako pilota arin eta biziekin aritzea, oso ulertzekoa da pilotari ezin kolokatu izatea. Azkenean partida 22ra da eta ez dizu denbora ematen pilota honetara jartzeko".
Aurrera begira, Larrartek eskuz binakako Gipuzkoako Txapelketa ari da jokatzen, eta baita palan ere. "Aspaldi hasitako txapelketak dira, eta eskuz finalean gaude, eta palan finalerdietan, eta gogoz bukatzen joateko", esan du bidaniarrak. Urkizuk, bere aldetik, txapelketa honetarako prestatu da azkenaldian. "Hemendik aurrera, entrenatzen jarraitu eta txapelketaren bat ateratzen bada, jokatzeko prest egongo gara", gaineratu du berastegiarrak.
Beste partidak
Eguerdiko jaialdian jokatutako beste partidan, tanto bakarrarengatik irabazi dute Irantzu Etxebestek eta Olatz Ruiz de Larramendik Amaia Aldai eta Gentzane Aldai bikotearen aurkako partidan, 22-21. Urdinak izan dira berez azken zatian aurretik joan direna, baina Etxebestek eta Ruiz de Larramendik eutsi egin diote eta azkenean gai izan dira finalerdietara pasatzeko. Argazki galerian ere badaude partida honetako zenbait argazki.
Arratsaldeko jaialdiko lehen partidan, 22-1 irabazi du Iera Agirre-Maite Ruiz de Larramendi bikoteak Andrea Aldaregia-Nora Mendizabal bikotearen aurkako partida. Bigarren partidan Ainhoa Ruiz de Infante-Arrate Bergara bikoteak galdu egin du 4-22 Olatz Arrizabalaga-Naroa Agirre bikotearen aurka.