Ahozkotasuna landuko dute datozen asteetan

Bihar emango zaio hasiera Ahoz Aho ahozkotasunaren nazioarteko jaialdiari. Martxoaren 13ra bitarte, kontakizunek eskualdeko hainbat herri hartuko dituzte. Oñatin hasiko dira bihar, eta etzi Amezketan jarraituko dute.

Jaialdia hamalaugarren ediziora iritsi da, eta eskualdean hainbat helmugatan jardungo du, Tolosaz gain: besteak beste, Ibarran, Amezketan eta Albizturren. Eskualdetik kanpo ere, Ordizian, Ataunen, Oñatin, Arrasaten eta Arabako Ozaeta-Barrundian izango dira. "Modu horretan jaialdiaren izpiritu bidaia zalea piztu nahi dugu", azaldu du May Gorostiaga Intujai teatroko kideak. Herriz herri mugitzeko nahi hori aurtengo kartelean islatu dute: bapore bat airean irudikatu dute puztutako kalabaza bati helduta. Horrela antolatzaileek bidaiatzeko gonbita egin dute.

Urtero bezala, Euskal Herriko artistekin batera, nazioarteko kontalariek ere beraien sormen lanak aurkeztuko dituzte. Gorostiagak zehaztu duenez, "normalean artisten %80 euskaldunak izan ohi dira, baina gure programazioa aberastu egiten dugu nazioarteko artistekin batera". Hego Amerikatik heldu dira aurten hainbat gonbidatu: Soledad Felloza Uruguaitik, Ruben Martinez Venezuelatik eta Nicolas Buenaventura Kolonbiatik. "Guztien artean programazio zabala eta interesgarria osatu dugu, eta gerturatuko den publikoa liluratzea da asmoa".

Ipuin kontakizunez gain, jaialdiak bestelako eskaintzak ere prest ditu. Esaterako, narrazioari buruzko ikastaro trinko bat eskainiko du Soledad Fellozak, otsailaren 27an eta 28an. Amarozko auzo elkartean izango da eta guztira, 12 orduko iraupena izango du. Bi egunetan egingo dute, 10:00etatik 13:00etara eta 15:00etatik 18:00etara. Gorostiagak esan duenez, ikastaro horrekin "lanerako tresna gehiago" hartzeko aukera izango dute.

Horrekin batera, bidea emango zaio aurten ere Euskal Narratzaileen Topaketari. Martxoaren 13an izango da, eta ekitaldi horrekin itxiko dute aurtengo jaialdia. Urtero gai bat hartzen dute eztabaidarako, eta aurten, euskal ahozkotasunaren gainean egindako tesiak izango dituzte hizpide, Kontatu zure tesia izenburupean. Horretarako, Antton Irusta, Leire Diaz de Gereñu eta Amaia Elizagoien gonbidatu dituzte euren tesien azalpenak ematera.

Egun hori Urrezko Kalabazaren saria emateko ere baliatuko dute. Sari horrekin kontalaritzan egindako ibilbidea saritu nahi izaten dute antolatzaileek, eta aurten, Itziar Zubizarreta kontalaria izango da sarituko dutena, "euskal ahozko narrazioan ezinbesteko erreferentea izateagatik". Beste bi urrezko kalabaza ere eman ohi dituzte, baina horien irabazleak egunean bertan jakinaraziko dituzte.

Iazkoa bertan behera utzi behar izan zuten, nahiz eta udazkenean zerbait errekuperatu. Intujai teatrotik esan dute beharrezko neurriak hartuta lortu dutela aurtengoa aurrera ateratzea. "Hitzak esateko beharra duenean bere bidea bilatzen du".