Pasa den igande goizean, urtarrilak 31, Tolosako Ezpala gaztetxean formakuntza saio bat egiteko hitzordua genuen Tolosaldeko Itaiako kideok. Bertan geundela, indar polizialak bertaratu ziren, eta eraikinetik banaka irten eta identifikatzera behartu gintuzten. Osasun neurri guztiak betetzen ari ginen arren, horrelako ekimenak debekatuak daudela adierazi ziguten ertzainek, Tolosa gune gorrian dagoela argudiatuz. Aldi berean, azken aste hauetan Tolosako Udalak tailer eta hitzaldi desberdinak eskaini ditu. Argi dago beraz, igandean jasandako erasoak helburu bakarra zuela: antolakuntza politikoa oztopatzea.
Tolosaldeko Itaiatik gogor salatu nahi dugu jasandako erasoa, eta azpimarratu nahi dugu ez zuela inongo irizpide sanitariorik. Askatasun politikoen aurkako eraso zuzen bat izan zen, emakume langileon askapenera bidean lan politikoa egitea oztopatzen duena. Honen aurrean, lanean jarraitzeko konpromiso osoa adierazi nahi dugu, emakume langileon gaitasunak antolatuz. Egun bizi dugun testuinguruan, inoiz baino beharrezkoagoa zaigu egunerokotasunean lan politikoarekin jarraitzea, formakuntza saioak zein bestelako ekimenak burutuz, betiere osasun neurri guztiak bermatuz.