Sare-k Euskal Herria mailan antolatutako Bidea Gara ekimenak Tolosaldean ere erantzun zabala izan du. 2.000 pertsonatik gora atera dira herriko plaza edo kaleetan egin diren ekitaldietan parte hartzera.
Eskualdean egin diren ekitaldietan Zizurkil eta Villabona artean burutu den Aiztondo mailako mobilizazioa nabarmendu dute antolatzaileek. Bertan, Aiztondo bailarako herritar, eragile eta elkarte ugarik eman dio babesa deialdiari. Hain justu, 700 pertsona inguruk zeharkatu dituzte bi herrietako kaleak.
Tolosan, berriz, 550 pertsona elkartu dira herriko bi zubiak lotzeko.
Hauez gain, Altzo, Amezketa, Anoeta, Alegia, Berastegi, Bidania-Goiatz, Gaztelu, Ibarra, Ikaztegieta, Irura, Leaburu-Txarama, Lizartza, Orendain edota Orexako herritarrek eskatu dute egungo espetxe politikarekin amaitzea.