Elurrari eta hotzari aurre eginez, ehunka herritar atera dira kalera Sarek deitutako mobilizazioarekin bat eginez. Izan ere, urtea hastearekin batera, Bilbon eta Baionan salbuespenezko espetxe politika amaitzeko eskatuz egin ohi diren manifestazioak, egungo egoerak bultzatuta, herriz herriko mobilizazio bilakatu dira aurten.
Tolosaldean, askotariko mobilizazioak izan dira herrietan, eta Aiztondo bailararen kasuan, Zizurkilgo Joxe Arregi plazan hasi eta Villabonako Arroa auzora bitarteko bidea egin dute manifestazioan parte hartu duten ehunka herritarrek. Antolatzaileen arabera, 700 pertsona izan dira orotara mobilizazioan parte hartu dutenak, izan ere, ibilbidean zehar elkarte, herritar edota erakunde desberdinak taldeka batzen joan dira. Zizurkilgo nekazariak izan dira euren traktoreekin manifestazioaren buru jarri direnak, eta horien atzetik, Asteasu eta Zizurkilgo trikitilariak, bailarako herritarrez osaturiko taldeak, Aizkardi mendi elkarteko kideak, Ernai eta gaztetxeetako kideak, Irrintzi eta Beltza-enea elkarteetakoak, Villabonako EH Bilduko kideak, talde feministak, pentsiodunak edota motxiladun umeak. Fleming haurreskola dagoen plazara iritsi aurretik mobilizaziora batzen azkenak, berriz, presoen senideak izan dira.
Behin plazan, ibilbide osoan bezala presoen aldeko aldarriek jarraitu dute, eta Izan Bidea ekimenaren irudia irudikatu dute herritarrek, kandelak eskuetan zituztela. Antolatzaileak "oso gustura" agertu dira mobilizazioak izan duen erantzunarekin, aurreikuspenak gainditu baititu.
