Euskal Herri guztian alderdi politiko, sindikatu eta eragile sozial ugarik mobilizazioak deituak zituzten gaur eguerdirako, Demokrazia lelopean hartuta. Espainiako Auzitegi Gorenak astelehenean erabaki zuen Bateragune auziko epaiketa berriro egitea, Giza Eskubideen Europako Auzitegiak ebatzi eta gero, Arnaldo Otegik, Rafa Diezek, Sonia Jacintok, Miren Zabaletak eta Arkaitz Rodriguezek ez zutela epaiketa justurik izan.Bateragune auziko bost auzipetuak atzera epaitzea «derrigorrezkoa» da, Espainiako Auzitegi Gorenaren ustez, eta erabaki horren "kontra egiteko" eta "demokrazia aldarrikatzeko" kaleak hartu dituzte, gaur, eskualdeko herritarrek. ELA, LAB, Steilas, ESK, Ahal Dugu, Ezker Anitza, EH Bildu, Nafarroako Ezker Batua, EH Bai, Gure Esku, Emakumeon Mundu Martxa, Bilgune Feminista, Sare eta Etxerat izan dira mobilizazioaren deitzaileak.Tolosaldeak bat egin du dei horrekin, eta demokraziaren alde Alegian, Altzon, Amezketan, Anoetan, Berastegin, Bidania-Goiatzen, Gaztelun, Ikaztegietan, Iruran, Lizartzan, Tolosan edota Orexan elkarretaratzeak egin dituzte. Aldiz, Aiztondo bailarako herriek manifestazioa antolatu dute. Zizurkilgo Joxe Arregi plazan elkartu dira herritarrak eta Amasa-Villabonako plazarainoko bidea egin dute kaleak zeharkatuz.