Bertako produktuak, elikadura sistemaren oinarri
Tolosako Elikadura Onaren Plangintza osatzeko Tolomendi Landa Garapen elkarteak martxan jarritako proiektua da 'Jan Tolosaldea'. Elikadura egokian, osasunean, tokiko ekonomian eta ingurumenaren zainketan eragiten duen sare zabal bat osatu da, lankidetza eta merkataritza justua sustatzeko: erakunde publikoak, ekoizleak, ostalaritza, komertzioa, ikastetxeak… Saretze lan horretarako Tolosaldea Garatzenen babesa izan du Tolomendik, baita elikagaien ekoizleentzat merkatu berriak bilatzeko lanean ere.
Elektromugikortasuna, enpresentzat aukera?
Tolosaldea Garatzenek sustatuta, LKS Aholkularitza etxea ikerketa bat egiten ari da eskualdeko enpresak kontuan hartuz, beren ekoizpena elektromugikortasunarekin zerikusia duten produktuetara bideratzeko izan ditzaketen aukerak aztertuz. Helburua da identifikatzea ekoizpen- eta negozio-aukera berriak enpresentzat, behin produkzioa sektore horretara bideratuz gero. Balio katearen mapa ari da garatzen, aukera gehiago izan ditzaketen enpresak lehenetsiz. Ikerketaren emaitzak 2021. urtean aurkeztuko dira.