Derbia seigarren jardunaldian iritsi bada ere, Laskorainentzat ligako hirugarren partida izango da eta Laubururentzat bigarrena, ezohiko denboraldi honetan hainbat partida bertan behera geratzen ari baitira. Laskorainek orain arteko bi partidak galdu ditu eta azpimultzoko zortzigarren eta azken postuan dago oraingoz. Aurreko asteburuan Gora Grupo Iron taldearen aurka jokatu zuten tolosarrek, eta 4-1 galdu zuten.
Bestalde, Lauburuk bere lehen partida jokatu ahal izan zuen aurreko asteburuan. Bere jokalari nafarrek taldearekin entrenatu eta partidak jokatu gabe egon ziren hasieran, Nafarroako Gobernuak hartutako neurriengatik. Behin horiek arinduta, eta laugarren jardunaldian taldean izan zen positibo batek jokatu gabe utzi ondoren, gogoz ekin zioten etxean jokatutako bosgarren jardunaldiko partidari. Gainera, 4-0 irabazi zioten Kukuyaga Etxebarri taldeari, eta une honetan bosgarren postuan daude hiru punturekin.