Koronabirusa

Tolosa ere gorritik laranjara pasa da

12 positibo izan dira azken egunean: Tolosan 8 eta Alegian, Ibarran, Larraulen eta Amasa-Villabonan bana. Amasa-Villabona eta Tolosa kolore laranjan ageri dira, 500etik beherako intzidentzia tasarekin.

Osasun sailak emandako datuen arabera, 8.693 test diagnostiko egin zituzten atzo, eta horietatik, 486 (%5,6) positiboak izan ziren. Gipuzkoan, 186 atzeman zituzten, tartean, 12 Tolosaldean.

Herenegun Amasa-Villabona kolore gorritik laranjara pasa bazen, atzo Tolosa izan zen, azken hamabost eguneko intzidentzia tasa kontuan hartuta 500etik behera kokatu zena, zehazki, 492ko tasa du Tolosak une honetan, eta 372 Amasa-Villabonak.

Bestalde, hainbat herri daude eskualdean azken hamabost egunetan covid-19an positiborik gabe: Abaltzisketa, Aduna, Alkiza, Altzo, Amezketa, Baliarrain, Belauntza, Berrobi, Bidania-Goiatz, Elduain, Hernialde, Leaburu-Txarama, Lizartza, Orendain eta Orexa.

Ospitaleen egoerari dagokionez, COVIDaren ondorioz 42 pertsona ospitaleratu zituzten atzo, 371 pertsona daude orotara EAEko ospitaleetan, eta  COVIDa duten 131 pertsona daude ZIUn.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!