Berrobiko David de Miguel eta Larraulgo Maite Arana alkateek, PSE-EEkoak biak, eta alderdiko eskualdeko zinegotziek ospitale publikoari buruzko argibide gehiago eskatu dizkiote Gotzone Sagardui Osasun sailburuari. Eskualdeak dituen osasun beharrak bete ahal izateko beharrezkoak diren "ezinbesteko" azpiegiturak zehazteko eskatu diote.
PSE-EEko hautetsiek gai honi lotutako bi gutun bidali dizkiote Sagarduiri eta erantzuteko eskatu diote. "Eskualdeko tokian tokiko erakundeekin koordinatzea eta harremana mantentzea eskatzen diogu", esan dute. Era berean, Gipuzkoako EAJri eskatu diote gaiari buruzko iritzi garbia emateko, "izan ere, Tolosako alkateak azpiegitura baten berri eman du jada eta Eusko Jaurlaritzak ez du aurreikusi ere egin".