Koronabirusa

Baheketa hasi dira egiten Amasa-Villabonako eta Zizurkilgo herritarrei

PCR probak egiten hasi dira bi herrietako 13 eta 40 urte arteko biztanleei Villabonako Behar Zana frontoian.

Koronabirusaren eragina handia da Aiztondoko bi herrietan. Azken hamabost egunetan 100.000 biztanleko pilatutako intzidentzia tasa 1.540ekoa izan da Amasa-Villabonan eta astebetean 48 positibo izan dira. Zizurkilen, berriz, intzidentzia tasa 1.254 da. Hori dela eta, Amasa-Villabona eta Zizurkilgo 13 eta 40 urte bitarteko herritarrei PCR probak egiten hasi dira gaur Villabonako Behar Zana pilotalekuan.

 

Osasun eta segurartasun neurriak errespetatzea eskatzen da bertan. Horretarako, pilotalekuaren sarreran kartel informatiboak aurki daitezke, non, bertan zehazten dituzten jarraitu beharreko pausoak: musukoaren erabilera derrigorrezkoa da; pilotalekura sartu aurretik derrigorrezkoa da eskuak gel hidroalkoholikoarekin garbitzea, udalak atarian jarri dituen poteak erabiliz; Eta pilotalekura sartzeko eta bertatik ateratzeko jarraibideak errespetatu behar dira, gezien bidez zehaztutako ibilbidea jarraituz. Herritar bakoitzaren txanda ere errespetatu behar da.

 

Gaur, ostirala, 15:30etatik 20:00ak arte iraungo du baheketak. Bertan, 800 PCR proba inguru egitea zen asmoa baina azkenean, 661 proba egingo dituztela adierazi du Arantxa Urruzolak, Amasa-Villabonako medikuak. Bihar bigarren txanda egingo dute goizeko 9:00etatik 14:00etara, eta bertan, 1.000 PCR proba egin ahal izango dituzte. "Momentuz biharko 450 proba bakarrik daude". Hala ere, oraindik eskaera egiteko aukera dagoela gehitu du Urruzolak. Hori dela eta,  943 00 69 70 telefono zenbakira deituz eskatu ahal izango dute 13 eta 40 urte bitarteko gainontzeko herritarrek biharko txanda.

 

 

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!