Segurako Baratze pilotalekuan larunbatean jokatu zen, Euskal Herriko Dantza Txapelketa. 13 bikote bertaratu ziren 44. ekitaldirako, ia denak gipuzkoarrak. Hain zuzen, Sopelaren izenean atera ziren Maren Galvez lezoarra eta Gorka Granado sopelarra, azken hau Villabonako Oinkari dantza taldeko kidea da. Bizkaiko Foru Aldundiaren oroigarria jaso zuten lehen bikote bizkaitarra izategatik eta laugarren egin zuten sailkapen orokorrean.
Oiartzualdeko Katerin Artola eta Iker Belintxon dira Euskal Herriko dantzari txapeldun berriak eta txapeldunorde geratu dira Laura Bastida eta Ekain Uzkudun azpeitiarrak.
Lehen aldia izan arren, sailkapenean hirugarren egin zuten Maitane Irurtzun adunarrak eta Gorka Duran billabonatarrak. 1977an lehen aldiz antolatu eta hurrengo urteetan txapelketa bultzatu zuen segurarraren izena daraman Guillermo Areizaga sari berezia eman zieten Oinkari dantza taldeko kideei, lehen aldiz parte hartu eta ondoen sailkatutako bikotea izateagatik.
Beatriz Unzue Amasa-Villabonako alkatea eta Garazi Bengoetxea kultura zinegotzia Seguran izan ziren larunbatean eskualdeko dantzariak animatzen.