Osasun sailak eman ditu atzoko PCR proben inguruko datuak eta eskualdeari dagokionez, nabarmen egin du gora azken orduetan COVID-19an positibo eman dutenen kopuruak. Hogei positibo zenbatu dituzte; 14 Tolosan eta bina Alegia, Amezketa eta Amasa-Villabonan.
Azken orduetan PCR proba gehiago egin dituzte; 10.022. Atzo 7.424 proba egin zituzten. Egindako azken probetatik 428 izan dira positibo, horietako 180 Gipuzkoan. ZIUn Araba, Bizkai eta Gipuzkoan 51 pertsona daude eta guztira 238 ospitaleratu daude.
Bestetik, Asuncion klinikan PCR probak egiten jarraitzen dute. Atzo hasi ziren langile eta paziente guztiei probak egiten, eta guztien emaitzak jakin arte ez dituztela emaitzak jakinaraziko esan dute. Gaurko kirurgia guztiak bertan behera utzi dituzte, prebentzio neurri moduan.