Gaurtik aurrera, ATARIAk asteartero jasoko du Elhuyarrek ETB1eko Teknopolis saioan egiten duen bideoa. Koronabirusaren gakoak du izena atalak, eta Ana Galarragak aurkeztuko du. «COVID-19a gaixotasun berria denez, alderdi asko oraindik ezezagunak dira edo denborarekin doaz ikusten eta ikasten«, dio Galarragak joan den asteburuko atalean. Horretan, birusaren iraunkortasuna izan du hizpide, zenbait gaixok denbora luze bat igarota ere sintomak dituztelako. Herbehereetako ikerketa bateko datuekin argudiatu du birusaren iraunkortasuna Galarragak. «Hori dela eta, gero eta ikerketa talde gehiago daude munduan gai hau aztertzen«.
Oraingo hau ez da ATARIAk Elhuyarrekin egiten duen mota horretako lehen elkarlana. Apirileko lehen egunetan, osasun krisi betean, koronabirusaz gehiago jakiteko, Elhuyarrek, COVID-19aren izurria argitzen izenburupean, ondorengo bederatzi bideo argitaratu zituen:
COVID-19aren IZURRIA ARGITZEN:
- 1. atala: Saguzarretatik gizakietara
- 2. atala: Mesederik ez
- 3. atala: Adin guztietakoak infekta daitezke
- 4. atala: Emakumeak zaurgarriago
- 5. atala: Erabateko konfinamendua
- 6. atala: Pandemiaren metaforak
- 7. atala: Birusaren mutazioak
- 8. atala: Tratamenduak proban
- 9. atala: Sukarra, adierazle