Lokotx biltzen, txingekin, zakuekin, lasterka eta trontzan aritu dira Araitz eta Beteluko gaztetxo eta gazteak nor baino nor, eta azkenean, Betelukoak izan dira garaile. 9'51'' denbora behar izan du Beteluko taldeak, eta 10'15'', berriz, Araizkoak.
Gaztetxoenak lokotx biltzen, 11 kiloko txingekin, 13,5 kiloko zakuarekin eta lasterka aritu dira, eta gazteak, berriz trontzan. Hain justu, egin beharreko lana ondorengoa izan da: 9 lokotx biltzen, txingekin lau plaza, zakuarekin lau plaza eta lasterka bakoitzak bi itzuli, eta trontzan, bi korte. Hori guztia lau aldiz egin beharra izan dute kirolariek. Araizkoak aurretik joan badira ere, azken txandan, Beteluk aurrea hartzea lortu, eta proba irabazi du.
Giro polita izan da eguerdian Zarateko lepoan, eta animo faltarik ez dute izan, ekitaldira gerturatu direnen partetik.