CaixaBank Masterseko hamahiru jardunalditan hamaika garaipen lortu ditu Artola-Rezusta bikote gipuzkoarrak, azkena asteburu honetan Tolosako Beotibar pilotalekuan, 9-22 garaituz Ezkurdia eta Aranguren. Azken hauek ia aukera gabe geratu dira finalerdietarako sailkatzeko. Gaur, Bengoetxea VI-Martijak Villamediana de Ireguan garaipena lortzen badute, nafarrek jokoan dagoen laugarren eta azken txartela eskuratuko dute. Artolak konfinamendutik atera berritan jokatu zuen partida.
Bere aldetik Altuna III-Imazek 15-22 garaitu zituzten Urrutikoetxea-Bikuña Igorren jokatutako partidan, era bederatzi garaipenekin sailkatu dira finalerdietarako. Norgehiagoka erraz hasi zuten 0-7 aurretik jarri ondoren. Urrutikoetxeak eta Bikuñak hala ere ez zuten etsi eta 11-15 hurbildu ziren markagailuan. Gora behera handirik egin gabe, urdinek abantailari eutsi zioten eta azkenean 15-22 gailendu ziren.
Jaka-Albisuk 22-16 galdu zuten Olaizola II-Zabaletaren aurka. Partidan ez ziren abantaila handiak izan inoren alde eta tanto ederrak eskaini zituzten lau pilotariek ikusleen gozamenerako. Azkenean, garaipena eta finalerdietarako txartela bikote nafarrarentzat izan zen. Jaka-Albisuk, Ezkurdia-Aranguren bikoak bezala, Bengoetxea VI-Martijak lortzen duten emaitzaren zain egon beharko dute.