Bigarren hezkuntzan, lanbide heziketan eta unibertsitatean ikasle greba deitu du Ikasle Abertzaleakek irailaren 15erako Ondorioak ez ditzala langile klaseak ordaindu lelopean. Osasun baldintza segururik egon ezean, aurrez aurreko klaseak bertan behera gelditzea exijitu du IAk.
«Burgesiaren ofentsibak aurrera darrai eta sistema kapitalistaren krisia inoiz baino nabarmenagoa da», esan du ikasle antolamenduak. Kapitala irabazi- dinamika ziklo berri bat artikulatu nahian dabilela uste du IAk eta hezkuntzari dagokionez, zehazki, digitalizazio prozesua nabarmentzen dela. «Klase telematikoak behin-behineko erabilerarako aurkeztu bazituzten ere, geratzeko etorri dira». Heziketa guneetan kontrol sozialerako arriskua ikusten du ikasle antolamenduak, azaldu duenez, "informazioaren eta edukiaren gaineko kudeaketa aurrerantzean, geroz eta gehiago, haiena izango den heinean".
IAk hezkuntzaren gaineko langile kontrola eskatu du beste behin, «doakoa, kalitatezkoa eta unibertsala». Hori lortzeko bidean, hainbat neurri berehala aplikatzea exijitu dute: «Ikasle langileek hezkuntzara sarbidea izan dezaten bermatzea; Ikasketa modalitate telematikoak sortutako zailtasun akademikoek ikasleen ikasketa prozesua ez oztopatzea; Eta lan politikoa eta militantea egiteko eskubidea bermatzea».