Ostiralean egindako probetan 15 kasu berri atzeman zituzten; 9 Tolosan, 2 Amezketan, eta Asteasun, Ibarran, Amasa-Villabonan eta Zizurkilen bana. Larunbatekoetan, berriz, 14; Amasa-Villabonan 4, Tolosan 3, Asteasun 2, eta Adunan, Alkizan, Ibarran, Iruran eta Zizurkilen bana. Azkenik, atzo proba egin zuten eskualdeko herritarren artean 7 positibo berri atzeman dituzte. Tolosan 4, Asteasun 2 eta Amezketan 1.
EAEri dagokionez, 866 positibo berri atzeman zituzten ostiraleko probetan, larunbatekoetan 673, eta atzo egindakoetan 409. Azken asteetako joerari jarraituz, igandeko datuetan beherakada bat nabari da. Hala ere, kontuan izan behar da PCR proba gutxiago egiten direla. Larunbateko datuen aldean, erdira jaitsi dira kasuak; egin diren PCR proba kopurua ere ia erdia izan da: 4.060 gutxiago.
Igandean egindako frogei erreparatuz, herrialdeka, Bizkaian izan dira kasu gehien beste behin: 225 positiboren berri eman dute. Gipuzkoan, 132 kasu izan dira, eta Araban azken egunetako zifrarik apalena izan da: 42 kasu. Bestalde, erkidegotik kanpo hamaika kasu detektatu ditu Jaurlaritzak.
Azken orduetan, 22 gaixo berri sartu dira erietxeetara; azken astean, 30en langa gainditu da egunero. Halaber, ia 300 pertsona (295) daude Araba, Bizkaia eta Gipuzkoako ospitaleetan gaitzaren eraginez; horietatik 35 Zainketa Intentsiboetarako Unitateetan.
Azken positibo berrien ondorioz, Oinarrizko Birsorkuntza Tasa (RO) 1,08an kokatu da.