Eusko Jaurlaritzako azken datuen arabera Tolosaldean zazpi kasu berri daude. Tolosan eman da gorakada, eta atzo lau kasu baziren, gaurkoan, bost dira PCR proba egin ostean positibo eman dutenak. Beste bi kasuak Ibarrakoak dira.
Atzo ia 2.000 proba gehiago egin zituzten bezperakoarekin alderatuta. 9.121 PCR proba izan dira eginikoak, eta horietatik 724k eman dute positibo Euskal Autonomia Erkidegoan.
Lurraldeen arabera, Gipuzkoan igoera eman da, eta guztira 138 positibo zenbatu dira; Araban 124 eta Bizkaian 431. Aldiz, kanpoan bizi diren pertsonetan eman diren positiboak 31 izan dira.
COVID-19aren ondorioz ospitaleratutako pertsonek ere gora egin dute. Atzo, 50 pertsona ospitaleratu behar izan zituzten, eta 21 pertsona daude ZIUn sartuta. Guztira, atzo baino lau pertsona gehiago daude ospitalean, 180.