Atzo egun berezia izan zuten Zizurkilen. Lehen aldiz, pilotari profesionalen partidak jokatu ziren Intxaur frontoian.
Lehen partidan Erasun herritarra eta Peña II.a tolosarra jokatzekoak ziren hasiera batean, baina azkenean, Bakaikoa eta Ibai Zabalak jokatu zuten partida Dario eta Garmendiaren aurka. 22 eta 15 amaitu zen partida, Dariok eta Garmendiak eskuratu zuten garaipena.
Ostean etorri zen txapelketako partida. Jaka eta Albisuk, Artola eta Rezusta izan zituzten aurrean. Partida parekatuta hasi zen. Bina eta launa berdindu zuten, baina behin hortik aurrera urdinek hartu zuten aurrerako bidea. Lehen atsedenaldira 12-7ko emaitzarekin iritsi ziren. 10-13 gerturatu ziren Jaka eta Albisu, baina azkenean 14-22 bukatu zen partida, Artola eta Rezustak beste garaipen bat poltsikoratuta. Sailkapeneko lehen postuan dago alegiarra, Rezusta lagun duela.
Sailkapeneko bigarren bikotea da Altuna III.ak eta Imazek osatua. Hauek ere, atzo jokatu zuten partida, Zestoan, Bengoetxea VI.a eta Martijaren aurka. 22 eta 16 irabazi zuten partida amezketarrak eta oiartzuarrak. Hauek gainera, ligako sailkapeneko beste partida jokatu beharko dute, bihar, Oiartzunen. Kasu honetan, Ezkurdia eta Aranguren izango dituzte aurkari.