ARGAZKI GALERIA

Arria V.a eta Izeta VI.a izan dira azkarrenak

I. Binakako Euskal Pentatloia Xabier Orbegozo Arria V.ak eta Andoni Iruretagoiena Izeta VI.ak irabazi dute, Tolosako Zezen plazan. Egin beharreko lanak 40 minutu eta 58 segundoan amaitu dituzte, Kepa Peñagarikano eta Joxean Olaskoaga Aizperro bikotearen aurretik sailkatuz. Iñaki Errazkin tolosarrak eta Aratz Mugertzak utzi egin behar izan dute lehia.

Herri kirol zaleek, gaur, Tolosako zezen plazan zuten hitzordua. Zazpi bikoteren artean I. Binakako Euskal Pentatloia jokatu da, segurtasun neurri guztiak hartuta.

Hiru txandatan banatuta plazaratu dira zazpi bikoteak, eta guztietan azkarrenak azken txandan plazaratu diren Xabier Orbegozo Arria V.a eta Andoni Iruretagoiena Izeta VI.a izan dira.

40 aldiz 100 kiloko bola altxatu behar izan dute hasteko. Jarraian, giza proban lau plaza egin, eta lau kana-erdiko ebaki ostean, 50 kiloko bi txingekin 8 plaza egin behar izan dituzte, eta bukatzeko, lau kilometro korrika egin dituzte, hau da, ehun itzuli eman dizkio bikote bakoitzak plazari. Hori bai, proba bakoitzean bikoteko kide batek gutxienez %40a egin behar izan du.

Arria V.ak eta Izeta VI.ak 40 minutu eta 58 segundoan bukatu dituzte lan guztiak. Korrika azken itzuliak ahalik eta azkarren bukatzen saiatu dira, bigarren sailkatu diren Kepa Peñagarikano eta Joxean Olaskoaga Aizperro-ren denbora jakinda. Hauek, bigarren sailkatuek, 41 minutu eta 53 segundoan gelditu dute erlojua. Lehen txandako onenak izan dira.

Lehen txandan, Luis Txapartegiren ordez, Jokin Eizmendi aritu da Jagoba Otaegirekin batera, eta hirugarren bikotea, Julen Kañamares eta Xabier Urrutia nafarrek osatua izan da. Nafarrek, 49 minutu eta 42 segundoan bukatu dute beraien lana, eta Eizmendi eta Otaegik 54 minutu eta 07 segundo behar izan dituzte.

Bigarren txandan, Beñat Amade eta Osman Drame bizkaitarrak, eta Xabier Zaldua eta Jon Gisasola Zelai V.a bikoteak aritu dira. Bigarren bikoteak bukatu ditu azkarren lanak, 43 minutu eta 22 segundoan hain justu. Hauek, podiumeko hirugarren postua eskuratu dute. Amade eta Dramek, berriz, 50 minutu eta 25 segundo behar izan dituzte.

Azken eta hirugarren txandan erabaki da guztia. Xabier Orbegozo Arria V.a eta Andoni Iruretagoiena Izeta VI.a, eta Iñaki Errazkin eta Aratz Mugertza bikoteen txanda izan da. Mugertza zalantzekin etorri dela aipatu dute aurkezpenetik, eta azkenean, aizkorako lanak egin ostean, ezinean ari zen eta lehia bertan behera uztea erabaki du. Arria V.a eta IzetaVI.ak lanak ondo egin dituzte, eta korrika lasai hasi badira ere, azken bueltak erlojuaren aurka egin dituzte garaipena poltsikoratzeko.

Beroa izan da beste protagonistetako bat. Eguzkiaren berotan aritu behar izan dute kirolari guztiek. Bestetik, jende asko gerturatu da Tolosako zezen plazara pentatloiaz gozatzera, eta txalo zaparrada eta oihuak ere izan dira, kirolariak animatu eta egindako lana eskertzeko.

 

Sailkapena:

1. Xabier Orbegozo Arria V.ak eta Andoni Iruretagoiena Izeta VI.a: 40 minutu 58 segundo

2. Kepa Peñagarikano eta Joxean Olaskoaga Aizperro : 41 minutu 53 segundo

3. Xabier Zaldua eta Jon Gisasola Zelai V.a: 43 minutu eta 22 segundo

4. Julen Kañamares eta Xabier Urrutia: 49 minutu eta 42 segundo

5. Beñat Amade eta Osman Drame: 50 minutu 25 segundo

6. Jokin Eizmendi eta Jagoba Otaegi: 54 minutu eta 07 segundo

7. Iñaki Errazkin eta Aratz Mugertza. Utzi egin behar izan dute lehia.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!