Hainbat enpresa eta eragile artilea balorean jartzeko irtenbideak aztertzen ari dira. Proiektu horiek gauzatzen diren bitartean, ordea, Gipuzkoan artile bilketa modu antolatuan gauzatzen ari dira. Horretarako, Gipuzkoako Foru Aldundia, ardi sektoreko elkarteak, gestio etxeak, nekazaritzako sindikatuak eta Landa Garapeneko elkarteak elkarrekin ari dira lanean.
Aurtengo antolakuntzaren ezaugarri nagusia "sektorearen inplikazioa" izan dela azpimarratu dute, eta Lurgintza eta Abelurrekin (Gipuzkoako Landa Garapen Elkarteen Federazioa) batera.
Bilketa zerbitzua ahalik eta modu sinple eta merkeenean egiteko, prozedura landu eta adostu dute. Gipuzkoan artilea biltzeko bost puntu zehaztu dituzte, eta horietatik bi eskualdean izango dira: Asteasu eta Berastegi.
Asteasun hilaren 20an eta 27an jaso dute artilea Agroaldean, 188 industriagunean. Berastegin, berriz, hilaren 29an, Aitzerga auzoko Artalekun.
Interesa duten artzainek 696 433 602 telefono zenbakira deitu beharko dute. Bertan azalduko zaizkie artilea entregatzeko tokia, eguna eta ordua.
Finantzaketaren zati bat Gipuzkoako Foru Aldundiak lagunduko du, eta beste zatia artzainek ordaindu beharko dute. Iaz egin moduan, Nafarroara bidaliko dutela artilea konposta egiteko adierazi dute, "ekonomia zirkularra" sustatuz.