Eskualdeko pilotarien arteko neurketa ere izan da hirugarren jardunaldi horretan. Jaka lizartzarrak eta Albisuk 22-16 irabazi zieten Altuna III.a amezketarrari eta Imazi, Ceniceron jokatutako partidan. Tanto onak eta ikusgarriak izan ziren neurketan.
Hiru jardunaldi jokatuta, beraz, Artola-Rezusta torneoko buru da hiru garaipenekin. Jaka-Albisu bigarren doaz, bi garaipenekin, Ezkurdia-Aranguren (bi partida jokatuta) eta Bengoetxea VI-Martija bezala. Garaipen bakarra dute Altuna III-Imazek (hauek bi partida jokatuta) eta Olaizola II-Zabaletak. Ez dute garaipenik lortu oraindik Elezkano II-Aretxabaletak eta Urrutikoetxea-Irribarriak.
LAUGARREN JARDUNALDIA
Asteburu honetan laugarren jardunaldia jokatuko da, eta Altuna III-Imaz bikoteak bi partida jokatuko ditu, lehen jardunaldian bertan behera geratu zitzaiena ere jokatuko baitute. Hain justu, Ezkurdia-Arangurenen aurkako partida hori, ostiralean jokatuko dute, Azpeitiko Izarraitz pilotalekuan, 22:15ean. Laugarren jardunaldiari dagokiona igandean jokatuko dute, Artola-Rezustaren aurka, Zarauzko Aritzbatalde frontoian, 17:00etan hasita.
Partida berezia jokatuko du Jakak asteburu honetan, bere herriko frontoian, Lizartzako Aztinondon, jokatuko baitu. Albisurekin batera, Bengoetxea VI-Martijaren aurka jokatuko dute, larunbatean, 22:15ean hasita. Peña II.a orain arte Bengoetxea VI.a ordezkatzen aritu da, baina leitzarra osatu denez, berak jokatuko du Lizartzako partida.
Jardunaldiko beste norgehiagokak Olaizola II-Zabaleta eta Elezkano II-Aretxabaleta, eta Urrutikoetxea-Irribarria eta Ezkurdia-Aranguren izango dira.
PROMOZIO TXAPELKETA
Bestalde, Binakako Promozio Txapelketari dagokionez, finalerdietako ligaxkako partida erabakigarria jokatzea falta zitzaion Peña II.a tolosarrari. Bere bikotea Aranguren izan da, baina atzelaria CaixaBank Mastersa jokatzen ari da Ezkurdiarekin, eta uko egin dio binakako txapelketari. Hori horrela, Erasun zizurkildarra izango da Peña II.aren bikotekidea uztailaren 24an jokatuko duten partidan. Medranon (Errioxa) izango da eta Zabala-Ruiz izango dituzte aurkari. Peña II-Erasun bikoak partida hori irabaziz gero finalerako sailkatuko da, eta Erasunek ere partida hori jokatuko luke. Labriten izango da finala, abuztuaren 1ean, eta bertan zain egongo da dagoeneko sailkatuta dauden Agirre-Eskiroz bikotea.