Tolosako Migel Zeberio eta Villabonako Xabier Berasaluze Leturia musikariak, batetik, eta orain 40 urte Everesteko Tximist euskal espedizioko kide izan zen Felipe Uriarte mendizaleak, bestetik, Urmuga zeharkaldia antolatu dute uda honetarako.
Musikak eta mendizaletasunak bat egingo dute ekimen horretan, baina ez bakarrik. Kultura eta hizkuntzaren garrantzia azpimarratuko dute eta 19 eguneko zeharkaldi baten bidez egingo dute. Angulo Bortun (Salvada mendilerroa, Araba) hasiko dute ekimena uztailaren 14an eta abuztuaren 1ean Hiru Erregeen Mahaiaren gailurrean (Auñamendiak) bukatuko dute. Tartean 14 euskal musikariren emanaldiak izango dira. Musika emanaldiak mendietan eta mendien inguruko herrietan izango dira. Modu honetan herri txikiak biziberritzeko helburua ere badutela diote antolatzaileek.
MENDEBALDETIK EKIALDERA
Ur isuriagatik Euskal Herria bi aldetan banatzen duen mugari egiten dio erreferentzia Urmuga izenak. Eta beraz, mendebaldetik ekialdera, Euskal Herri osoa zeharkatuko dute. Natura mugak gainditu, eta mugarik gabe arituko dira, hala ere.
Ekimenean parte hartzeko gehienez 30 lagunentzako tokia dute eta 948 51 32 33 edo 685 75 07 63 telefono zenbakietan edo info@mendiaketaherriak.eus helbidera idatzita eman daiteke izena.
EGITARAUA
1. etapa. Angulotik Orduña portua.
2. etapa. Orduña-Altube portua.
3. etapa. Altube-Barazar portua.
4. etapa. Barazar-Krutzeta portua.
5. etapa. Krutzeta-Arlaban.
6. etapa. Arlaban-Aumutegi-Usakoetxena.
7. etapa. Usakoetxena-Otzaurte portua.
8. etapa. Otzaurte-Lizarrusti.
9. etapa. Lizarrusti-Albiasu herria.
10. etapa. Albiasu-Orin-gaña.
11. etapa. Orin-gaña-Belate.
12. etapa. Belate-Urkiaga lepoa.
13. etapa. Urkiaga-Ibañeta.
14. etapa. Ibañeta-Errozate.
15. etapa. Errozate-Burdinkurutzeta.
16. etapa. Burdinkurutzeta-Bagargiak.
17. etapa. Bagargiak-Larraineko lepoa.
18. etapa. Larraineko lepoa-Erraize.
19. etapa. Errraize-Hiru Erregeen Mahaia.