Tolosako Usabal kiroldegiak eta Berazubi estadioak, eta Ibarrako Belabieta kiroldegiak atzo zabaldu zituzten beraien ateak erabiltzaileentzat. Egun lasaia izan zen erabileraren aldetik, ez baitzen jende pilaketarik izan kirol azpiegituretan.
Kirolzer enpresak kudeatzen ditu Tolosako kirol azpiegiturak, eta bertako kudeatzailea den Asier Martinek azaldu duenez, lehenengo egunean «erabiltzaile gutxi» izan dituzte: «Askoz jende gehiago etorri da informazio eske. Badirudi oraindik informazio pixka bat falta dela, eta jendea pixkana etortzen ari dela. Hemendik jendea etortzera animatzen dugu, instalazioek jende askoz gehiago hartzeko ahalmena baitute». Atzo goizean, esaterako, Usabalen ehun erabiltzaile baino gutxiago zeuden.
Aurretik hitzordua hartuta joan behar da Usabalera eta Berazubira, eta horretarako egokitzen ari diren sistemari azken ukituak ematen ari dira. «Informatikoki erronka handia jarri dugu, eta hori egiten ari den enpresa epeekin larri ibili da eta azken momentura arte ezin izan dugu dena martxan jarri, eta oraindik ere zenbait akats zuzentzen ari dira», zehaztu du Martinek.
Usabalgo barruko igerilekura familiarekin joan den erabiltzaile batek azaldu duenez, «gogoz geunden igerilekura joateko. Ikusita kalean dagoen martxa, eta hau itxita, gogo handiz geunden dagoeneko. Dena oso ondo antolatuta dago, eta guk kutxatilategia erabili ondoren desinfektatu egin dugu».
IBARRAN ERE, HITZORDUAREKIN
Ibarrako Belabieta kiroldegia, bazkideentzako ireki da eta bakarrik fitness edo muskulazio gela egongo dira erabilgarri. Aurretik hitzordua eskatu beharko da, printzipioz ordubeteko saioak egiteko.
Lehenengo eguna «pixka bat arraroa» izaten ari dela dio Kike Urangak, harrera gunean egoten den langileak. «Poliki-poliki ari gara joaten. Jendeak badaki zein diren neurriak, eta dauden zalantzak argitzen joango gara. Ea pixkana joaten garen normaltasunera iristen».
Atzo Belabieta kiroldegian zegoen erabiltzaileetako bat Gaizka Maiza saskibaloi jokalari ibartarra zen. Berarentzako ez zen lehen eguna izan atzokoa, Josu Ibarbia futbol jokalariari eta berari aurretik utzi baitiete instalazioak erabiltzen. «Biok ari gara denboraldi ondorengo moduko bat egiten. Orain jendea etorriko da, baina dena kontrolatuta dagoenez, ondo moldatzen gara», zehaztu du Maizak. «Denok ohitu behar dugu neurri berrietara».