Hamaika kontu esateko zituzten gaur eskualdeko herritarrek. "Martxoan operatu ninduten. Bi hilabete egon naiz etxean, eta gaur atera naiz lehen aldiz" zioen Anoetan amona batek gustura paseatzen ari zen bitartean.
Amezketan familia bat ohi baina distantzia luzeagoa egiten ari zen, "batez ere, etxetik ateratzeagatik". Abaltzisketa bidean bizikletarekin zihoan beste bat, "hemendik aurrera lanera ere bizikletaz joango nauk, erabakia hartua diat". Urte Zahar gaueko desio horien itsura zuen esan horrek, baina gertutik jarraitzekoa izango da betetzen duen edo ez.
Altzo inguruetan ere paseoan eta kirola egiten ibili dira herritarrak. Lizartzan, alkatea lanean herriko iturrietan seinaleak jartzen. Berrobin alaba etxetik ateratzea kosta zaion ama: "Hauek jana eta Interneta izanez gero...". 40 egun hauetan ikasi ez badute... Kirola egiten zebilenik ere bazen, "ufa, uste dut gehiegi jan dudala egun hauetan".
85 urterekin itzulitxoa egitera joan den amonak, "multa ez didazu jarriko, ezta?" esan ondoren, argazkirik ez duela ateratzerik nahi esan du: "Beti begiak itxita ateratzen naiz". Atzetik ateratzeko arazorik ez, ezta? "Ez, ez. Ipurdia ez! 20 urte banitu, orduan bai, baina orain hori ere galdua dugu. Gizonak beti esaten zidan ezkonduberritan, ea noiz utzi behar nion nire ipurdiari begiratzeari. Eta egia zen, egun osoa horretan pasatzen nuen".
Ibarran herriaren mugak ikusi dituenik izan da, eta gustura gainera: "Balkoiaren mugak ezagutzen jada nazkatuta geunden". Alkizan distantzia mantenduz txukun jarri dira argazkirako. Kamara ikusten dutenean, gainera, "zein polita naizen erakusteko" ez dute arazorik. Sorarrainen bideoen efektoa izango da, ziurrenik.
Asteasu inguruetan, jendea paseoan industrigunearen inguruko bide gorritik. Eta Zizurkilen, bi agure maskara eta guzti: "Guri kirola egiten ez atera, paseoarekin nahikoa dugu".
Esan bezala, gaurkoan herritarrak paseoan, kirola egiten eta mila historia eta istorio kontatzeko gogoz.