HELDUEN MAILAKO IRABAZLEA
ANE ZUBIA ARANALDE (IBARRA)
Etorkizuna begi aurrean
ta iragana mamituz
Orratza eta errima hartuta
bertsolaritza harituz.
Barruan sartu maitasun paper
hiru bertso, lau errima
beti soinean eraman dezadan
bertsolaritzaren arima.
Lehen kopla bat lehen potoa
ta lehen hanka luzea
ze polita den haur gazte batek
bertsoa ezagutzea.
Bakoitzak badu bere helmuga
eta bere helburua
baina elkarrekin apain dezagun
euskararen ingurua.
Hartu arkatza, lehen orria
ta jarri martxan burua
sortu dezazun koadernotikan
bertsoaren liburua.
Etorkizuna begi aurrean
ta iragana mamituz
orratza eta errima hartuta
bertsolaritza harituz.
UMEEN MAILAKO IRABAZLEA
BEÑAT MATEOS ZEBERIO (ASTEASU)
Zaharrak kalean, haurrak etxean
egiten zaigu arraro
lehenengoentzat baita haurrentzat
baino arriskutsuago
Pertsonak eta eskubideak
aldatu dira zeharo:
orain kalera ateratzeko
txakurren beharra dago;
umeak ditu txakurrak baino
eskubide gutxiago.