Nafarroako Basaburua bailaran hastekoa zen Euskal Herriko Sega Liga, eta egoeraren ziurgabetasuna kontuan hartuta, Almitza elkarteak bertan behera uzteko erabakia hartu du. Hori bai, elkartetik adierazi dutenez, "egoerak onartuko balu" ez dute baztertzen urtea aurrera doan heinean "bestelako ekitaldirik" antolatzea.
Bestalde, elkartetik azaldu dutenez, nazioarte mailako sega txapelketetan ere eragina izaten ari da osasun krisia. Hala, Almitza elkartetik baieztatu dute uztailean Eslobenian jokatzekoa zen Munduko Sega Txapelketa ez dela jokatuko. "Beraz, gure nazioarteko hurrengo erronka nagusia, 2021 urtean Eslobenian izango den Europako Txapelketa izango da", esan dute.
Lehia momentuz etenda dagoen arren, lanean jarraitzeko konpromiso irmoa du Almitza elkarteak: "Zailtasunak zailtasun, ziur izan gure jardunean sendo jarraituko dugula, sega babestu, sustatu eta hedatzeko ahaleginean".