Mundu osoan ematen ari den egoera dela eta 2020ko udarako Oporrak Bakean programa ez egitea erabaki dutela esan du Espainiako Saharako Ordezkaritzak. Erabakia "mingarria" izan dela esan dute, baina euren ustez erabakirik egokiena dela adierazi nahi izan dute. Hala ere, saharar herria indartsu eta bateratuta dagoela esan du, "irmo dago horrenbeste sakrifizio eskatu dizkion helburu zintzoak lortzeko".
Tolosaldeko Oporrak Bakean programaren koordinatzaileak, Ana Traperok, esan du kezkatuta daudela: "Orain kezkatzen gaituena da haurrek nola pasako duten uda kanpamentuetan bertako uda gogorreko baldintzetan".
Fronte Polisarioak esan du jakitun dela elkartasun mugimenduak "konpromiso politikoa, moral eta humanitarioa" eskatzen duela eta lanean jarraituko duela haurrek uda honetarako dituzten behar anitzak asetzeko programa alternatibo bat aurkitzeko. Errefuxiatuen kanpalekuetako haurrek bizi duten muturreko egoera arindu behar dela ere esan du.