Herritarrak marrazten jarri nahi dituzte Berastegin eta Bidania-Goiatzen

Haur, gazte nahiz helduak marraztera gonbidatu dituzte Beratsegiko eta Bidania-Goiazko udalek. Ondoren, bildutako marrazki guztiekin, erakusketa bat jarriko dute Berastegin; Bidania-Goiatzen, berriz, herriko webgunera igoko dituzte.

Itxialdia arintzeko, badute beste aitzakia bat berastegiarrek. "Egun hauetan sentitzen ari zarena paperean islatzen saia zaitez", esan dute udaletik. Margolari sena martxan jarri, eta behin marrazkia eginda, sare sozialetara igo beharko da Berastegiko Udala etiketatuz, eta gainerakoan helbide honetara bidal daiteke: kultura@berastegi.eus. Konfinamendua amaitzean, marrazki guztiak fisikoki bilduko dituzte, eta aurrerago erakusketa bat jarriko dute.

Bidania-Goiatzen ere antzeko egitasmo bat jarri dute martxan, udalak eta Ernio Guraso Elkarteak. Antolatzaileek adierazi dutenez, "etxean gaude eta denbora pasatu behar dugu, horregatik, marrazkiak egitera animatu nahi zaituztegu. Hau egiteko ez dagoenez adinik, herritar guztiak gonbidatuta zaudete. Animatu eta erakutsi artista bikainak zaretela!". Nahi adina marrazki egin ditzake bakoitzak, nahi den modura. Ondoren, argazkia atera eta whatsappez bidali behar da 603 721 845 telefono zenbakira. Herriko webgunera igoko dituzte bidalitako marrazki guztiak.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!