Udaleku irekietarako begiraleak behar dituzte Aiztondon

Aduna, Alkiza eta Larraulgo umeentzat antolatuko dira udalekuak eta bertan aritzeko begiraleak behar dira.

Urtero legez, Aduna, Alkiza eta Larraulgo udalek herriko haur eta gaztetxoentzako udalekuak antolatzeko lanean ari dira. Udalekuak ekainaren 22tik uztailaren 17ra arte egingo dira eta begirale izan nahi dutenek, apirilaren 5era arte eman dezakete izena Aiztondo Zerbitzuen Mankomunitatean.

Begirale izateko, nahitaezkoa izango da 18 urte beteta edukitzea, DBH tituluaren jabe izatea, euskara ulertu eta ongi hitz egitea eta elkarrizketa eta talde dinamika gainditzea. Curriculuma eta bertan adierazitako datuak egiaztatzeko agiriak aurkeztu beharko dira izena ematerakoan. Aisialdiko zuzendari titulua, aisialdi begirale titulua, ikasketak, prestakuntza ikastaroak, EGA eta lan esperientzia izatea baloratuko dituzte hautagaiak aukeratzerako orduan. Begiraleei elkarrizketak beranduago egingo zaizkie.

Parte hartzeko interesa dutenek eskatutako dokumentazioa aterpeak@urtxintxa.eus helbidera bidali beharko dute, Aiztondoko Udalekuak izenpean. Deialdiari buruzko xehetasun gehiago Aduna, Alkiza eta Larraulgo udaletxeetako web orrietan izango dute interesatuta dauden herritarrek.

 

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!