Azal berria, mamiari heltzeko

Tolosaldeko Ataria-k beste jauzi bat emango du bihar. Astekariaren diseinua aldatu da eta itxuraldatuta iritsiko da Atarikideen eskuetara. «Astekaria, orain arte bezala, patxadaz irakurtzekoa izan behar dela uste dugu, eta diseinu berria horretara bideratu dugu. Zuritasuna bilatu dugu eta testuak irakurterrazak izatea nahi dugu, bai lehen begiratu batean, eta baita kazetaritza aldetik ere, landutako gaiei buruzko informazio osagarria emanaz», esan du Naiara Roldan de Aranguiz astekariko koordinatzaileak.

Ataria-k kolaboratzaile sare zabala du eta hori indartzea ere bada bere erronketako bat. «Orain arteko sarea mantendu dugu, eta kolaboratzaile berriak lotu. Iritziak, bertsoak, poesiak... idatziko dituzte, baina begirada grafikoari lekua egin nahi izan diogu eta bertan parte hartuko dute hainbat diseinatzaile grafikok, artistak, argazkilarik...».

Edukiari dagokionez gai nagusi bat lantzen jarraituko du Ataria-k, baina gai nagusiaz gain herritarrak izango dira protagonista astero-astero. «Agenda indartu nahi izan dugu ere, eta kultur agendari lotutako elkarrizketak argitaratuko ditugu». Itxura berria izango du aurrerantzean astekariak, baina orain arte bezala eskualdeko herritarrak izango ditu protagonista.