Gipuzkoako Foru Aldundiak azpikontratatutako sektore maskulinizatuekin alderatuz, zahar egoitzetako emakumeek jasaten duten arrakala %30ekoa dela jakinarazi dute gaur zahar egoitzetako langileek. "Urtean 6.000 euro gutxiago emakumeak izateagatik eta zaintza lanak egiteagatik. Honek esan nahi du urtean hiru hilabete eta erdi baino gehiago dohainik egiten dugula lan". Salatu dutenez arrakala ez da bakarrik soldatetan islatzen, emakumeek pairatzen baitituzte behin-behinekotasun tasa handienak, eta baita, jardunaldi prekarioenak (jardunaldi partzialak, jardunaldi zatituak, ordukako lanak...).
ELAko Gipuzkoako zahar egoitzetako grebalariek Tolosan egin duten agerraldian azaldu dutenez, egungo sistemak eta lan merkatuak emakumeak "bigarren mailako langile gisa" erabiltzen ditu. "Egiten ditugun lanak gutxietsi egiten ditu, bizitza sostengatzeko ezinbestekoak izan arren". Horregatik daude sektore feminizatu eta prekarizatuak greban. Grebalarien ustetan posible da soldata arrakalarekin amaitzea eta adibidetzat hartu dituzte Gipuzkoako epaitegi eta komisarietako garbitzaileak, 280 greba egun egin ondoren soldata arrakala %70 murriztea lortu dutenak; edota, Elorrioko Udalak azpikontratatutako langileak, bost hilabeteko greba egin ondoren kolektiboaren soldata %20 baino gehiago igotzea lortu zutenak.
Gatazka honi Gipuzkoako Foru Aldundiak amaiera eman behar diola irizten diote langileek eta aipatu dute ez dutela onartuko Markel Olanok "arrakala ezabatuz", sistema jasangarria ez dela esatea. Emakundek egunotan aipatu du soldata arrakalak emakumeen eta gizonen arteko ezberdintasuna "betikotzen" duela. Grebalarien ustez Gipuzkoako Foru Aldundiak berdintasunaren alde egiteko aukera paregabea dauka. "Eta bide batez, 222 eguneko grebari konponbidea emateko ere". Bien bitartean, Gipuzkoako zahar egoitzetako langileek borrokan jarraituko dute.