Finalerdietara iritsi da eskuz binakako Emakume Pilotari Txapelketa, eta gaur jokatuko dituzte bigarren edizioko finalerdiak, 20:45ean hasita, Alegiako Elorri pilotalekuan. Bigarren mailakoen partidarekin hasiko da jardunaldia: Tolosa eta Arraiza, Etxeberria eta Zubizarretaren aurka arituko dira; eta bigarren partida lehen mailakoena izango da. Arrietak eta Maddi Mendizabalek, Maider Mendizabal eta Badiolaren aurka neurtu beharko dituzte indarrak. Finalak otsailaren 15ean jokatuko dira.
Larunbatean, berriz, Emakume Master Cup txapelketako aurrekanporaketak jokatuko dira Villabonako Behar Zanan, 17:00etatik aurrera. Lau partida jokatuko dituzte, pilota goxoarekin: Salat eta Ballesta, Sagarna eta Marijuanen aurka arituko dira; Magunagoitika eta Mateo, Arratibel eta Etxeberria amezketarraren aurka; Zarrabeitia eta Oiarzabal, Ibarrola eta Zubizarretaren aurka; azken partida, Armendariz eta Salanuevak jokatuko dute, Nagore eta Galeanoren aurka.
'Las pelotaris’ dokumentala
Emakumeen kirola sustatzeko ekimenen artean, Las pelotaris dokumentala proiektatuko dute , gaur, 19:00etan, Villabonako Gurea zineman. Ondoren solasaldia izango da Anne Maiza eta Miriam Arrillaga pilotariekin.