Ez da asteburu ona izan eskualdeko pilotari afizionatuentzat. Irati Zabala lizartzarrak, Antzuolan jokatu zuen, Emakume Master Cup Txapelketaren barruan, pilota goxoko 16 urtez azpiko aurre-kanporaketako partida. Maialen Bediarekin osatu zuen bikotea, baina ez zuten garaipena lortzerik izan. Nagore eta Leire Galeano ahizpek, herritarren aurrean maila bikaina erakutsiz, 18-4 irabazi zieten. Larunbat honetan, hilak 8, Villabonan jokatuko dira txapelketako partidak.
Bestetik, Zumarragan, Euskal Herriko Kluben Arteko VI. Txapelketako final-laurdenetako partida jokatu zuen, Tolosa-Aurrerak, Irurtzunen aurka. Tolosako klubak, ezin izan zuen hiru partidetako bat bera ere irabazi. Lau eta erdikoan, Josu Olaetxeak, 18-7 irabazi zion Eneko Labakari. Buruz burukoan, 18-7 galdu zuen Amianok, Julen Retegi pilotari profesional ohiaren aurka. Binakakoan, Ongayek eta Bergarak 22-17 hartu zituzten mendean Elola eta Telletxea.
FINALERDIAK, BEOTIBARREN
Larunbatean, Migel Soroaren Oroimenezkoa Txapelketako lehen finalerdiak jokatu ziren, Beotibarren. Promesetan, Alberdi-Apezetxeak, 22-7 irabazi zieten, De la Fuente-Cuairani. Jubeniletan, Hormaetxek eta Sudupek 22-17 irabazi zioten Zubeldia-Uzkudun bikoteari. Elite mailan, 22-13 irabazi zuten Zubizarretak eta Uriondok, Canabalen eta Aldaveren aurka.