Tolosa Aurrerak agur esan dio Euskal Herriko Kluben Arteko Nazio Txapelketari. Fina-laurdenetan Irurtzunen aurka tokatu zitzaion, eta nafarrak 3-0 nagusitu ziren larunbatean, Zumarragan.
Lau eta erdiko partidan Eneko Labakak jokatu zuen Tolosa Aurreraren izenean. Albizturko pilotaria faboritoa zen Josu Olaetxearen aurka. 19 urteko aurrelariak, ordea, partida handia egin zuen eta 18-17ko emaitzarekin Irurtzungoentzat lehen puntua lortu zuen. Hor joan zitzaien kanporaketa tolosarrei, izan ere, buruz burukoan nahiko argi zeuden gauzak. Julen Retegik abenduan esan zion agur profesional ibilbideari. Larunbatean Irurtzunekin debutatu zuen afizionatuetan. Iker Amianoren aurka jokatu zuen Retegik. 16 urteko gazteak itsura oso ona eta freskoa eman zuen, baina beteranoa erraz nagusitu zitzaion bere jokoa eginez, hau da, pilota atzera eta atzera botaz. Amaieran markagailuak 18-7 erakutsi zuen, eta Irurtzungoek kanporaketa irabazirik zuten.
Binakakoa hala eta guztiz ere jokatu egin zen. Iñaki Elolak eta Xabier Telletxeak 22-17 galdu zuten Alberto Ongay eta Josu Bergeraren aurka.