Inoiz baino parekatuagoa aurreikusten zen, larunbatean Usabalen jokatu zen derbia. Laskorainek eta Lauburuk helburu desberdinak dituzte denboraldia hasi zenetik, eta biak ere gertu daude horiek lortzetik. Derbira heldu aurreko bi taldeen dinamika, ordea, ez zen berdina. Biek nahi zituzten hiru puntuak, bai hala bai, baina galtzeko gehiago zuten ibartarrek.
Hala, Lauburuk hasieratik erritmo azkarra jarri zuen. Horrela, ibartarrek ez zuten denbora asko behar izan arriskua sortzen hasi eta tolosarren atera erraz iristeko. Hala ere, jokoan nagusitasuna izan arren, ez zuen jokaldiak bukatzea lortzen. Laskorainekoei dagokienez, hauek ere ez zuten aurkarien ate aurrean asmatzen. Bien aldetik izan ziren markagailua estreinatzeko aukerak, nahiz eta inork golik ez sartu.
Lehen zatian, bi taldeek defentsan egindako lan ona goraipatu behar da. Horrela, gutxi izan ziren lehen 20 minutuetan jokoak izan zituen aldaketak, nahiz eta ibartarrek zutoinera zenbait jaurtiketa egin. Orduan, atsedenaldira 0-0eko berdinketarekin joango zirela zirudienean, baloia Odei Gartziarenaren atean sartzea lortu zuen Dani Garciak, atsedenaldirako ia 3 minuturen faltan.
Aldageletatik itzulitakoan, Laskorain oso indartsu hasi zen, borroka gehienak irabaziz, eta, horri esker, bigarren zatiari hasiera eman eta minutu batera markagailura gol bat igotzea lortu zuten. Iker Mansoren banakako jokaldi zoragarriari, amaiera bikaina eman zion Haritz Zabala Kattak. Gol horrek, berriro ere, berdinketa ekarri zuen baita jokoan ere. Hala ere, bigarren zatia aurrera zihoala, aukera bat bestearen atzetik sortzen jarraitu zuen Lauburuk.
Dena den, emaitza horrekin, eta lau jokalarirekin asmatzen ez zutela ikusita, arriskatzea beharrezkoa ikusi zuen Alfredo Hualde ibartarren prestatzaileak. Atezain-jokalaria kantxaratu, eta bosteko jokoaren alde egin zuen. Erabaki horrek markagailuan aurrea hartzeko balio izan zion talde moreari, Andoni Zumetak area barruan sartutako gol bati esker.
Berehala, Narciso Pavo Laskorain taldeko entrenatzaileak ere joko molde beraren alde egitea erabaki zuen, eta 5eko jokoak Endika Uriberen areara iristeko balio izan zien arren, Andoni Carlosena Antxonek markagailuan distantzia handitzea lortu zuen, baloia kontrolatu eta Laskorain taldeko atzelaria atzean utzi ostean. Gol garrantzitsua izan zen, erabakigarria. Handik gutxira, gainera, Javi Saldisek zelaiaren beste aldetik baloia jaurtiz, 1-4ekoa jarri zuen markagailuan.
Emozioa eta intentsitatea izan ziren nagusi, partida guztian zehar. Azpimarratzekoa da, bi taldeek erakutsitako izaera lehiakorra nahiz jokoa, eta partidan zehar jarritako erritmo bizia. Emaitza alde batera utzita, nabarmentzekoa da kantxan nahiz Usabalgo harmailetan, bi talde hauek duten gertutasunak eta elkarrekiko errespetuak irabazi zuela.
Argazkiak: Garazi Arregi.