Tolosaldeko zazpi ikaslek Ikasketa Amaierako Kutxa Saria jaso dute, joan den ikasturteko espediente akademikoa kontuan hartuta. Kutxa Fundazioa 1977an hasi zen errekonozimendu horiek eskaintzen, eta aurten ere Euskal Herriko Unibertsitateko, Deustoko Unibertsitateko, Mondragon Unibertsitateko, Tecnun-eko, Nafarroako Unibertsitateko, Musikeneko eta ziklo graduetako ikasleen lana saritu dute.
Horrela, Tolosaldeko zazpi espediente akademiko ere saritu dituzte: Iñigo Irazu tolosarra, Sareko Informatika Sistemen Administrazioan (AICE); Elixabet Mosqueira billabonatarra, Lehen Hezkuntzako Graduan (EHU); Nerea Elosegi tolosarra, Lidergo Ekintzailean eta Berrikuntzan (Mondragon Unibertsitatea); Nora Larrañaga tolosarra, Fabrikazio Mekanikoko Diseinuan (HETEL); Asier Arozena anoetarra, Enpresen Administrazio eta Zuzendaritzan (Deustoko Unibertsitatea); Ainhoa Elola tolosarra, Enpresen Administrazio eta Zuzendaritzan (Deustoko Unibertsitatea); eta Oihana Ugartemendia berastegiarra, Enpresen Administrazio eta Zuzendaritzan (EHU).
Ekitaldian, ikasketa zentro bakoitzeko ordezkariez gain, parte hartu zuten Cristina Uriarte Eusko Jaurlaritzako Hezkuntza saileko sailburuak, Carlos Tamayo Kutxa Fundazioko lehendakariak eta Ander Aizpurua Kutxa Fundazioko zuzendariak.