Bertan askotariko lanak egiten dituzte: karrozeriako lanak, txapa eta pintura, elektrizitate arloan ere aritzen dira… «Marka guztietako kotxeekin eta furgonetekin aritzen gara, eta motorrak nahiz furgoneta txikiak ere ekarri izan dizkigute», azaldu dute.
Badakite zein den hainbeste urtean lanean jarraitzearen arrazoia: kalitatearen eta prezioaren arteko erlazio ona. «Kalitate txukuna daukagu eta prezio justua». Hori bezeroek eskertzen diete, baita haiekin duten tratua ere: «Tratu ona ematen saiatzen gara, gertukoa. Jendea bueltan etortzen da, eta hori zerbaiten seinale izango da».
Etorkizunera begira ere, lanean jarraitzeko asmoa daukate: «Gaizki ere ez ditugu egingo gauzak hainbeste urtean hemen egoteko. Erretiroa ere bertan hartu beharko dugu».
