Gaur, 12:00etan, Tolosan elkarretaratzea egin dute eskualdeko pentsiodunek. Bertan, gutxieneko pentsioa 1080 eurotan kokatzeko nahikoa baliabide badaudela esan dute: "Estatuko gobernuak bermatu arte gutxieneko pentsioaren 1080 euroak, Euskal Autonomia Erkidegoan, aurrekontua 11.700 milioi eurokoa da; 52 milioirekin eta DSBE Diru Sarrerak Bermatzeko Errentaren bidez 1080 euroko gutxieneko pentsioa osatzea posible da".
Pentsiodunen ustez, edozein gobernuren "betebeharra" da "pertsonek bizitza duin baten baldintzak izateko, aberastasunaren banaketa zuzen baten baldintzak sortzea". Horren aurrean ondorengo galdera luzatu dute: "Posible al da pertsona batek eskubide horretaz gozatzea mila euro baino gutxiagorekin?".
Pentsiodunen aldarriak kalean 23 hilabete bete ditu. Aurrera jarraituko dutela esan dute, eta "gure etsipena besterik nahi ez duten diskurtso faltsuak" ez dituztela onartuko azaldu dute. Jokoan, pentsiodunen etorkizuna bakarrik ez dagoela gogoratu dute, "gizartearen gehiengoarena", baizik. Horregatik, herritar guztiak gonbidatu dituzte Gasteizko eta Iruñeko legebiltzarretan egingo diren mobilizazioetara.