Hasi da Binakako Pilota Txapelka. Lehen jardunaldiko partidak jokatuta, eskualdeko hiru pilotarietatik bik lortu dute garaipena. Jaka eta Artolak garaipena lortu dute, eta Altuna III.ak ezin izan du puntua eskuratu.
Ostiralean jokatu zuten Altuna III-Ladis Galarzak txapelketako lehen partida. 22-17ko emaitzarekin ezin izan zuten Ezkurdia-Martija bikotea mendean hartu. Hurrengo partidaren zain geratu dira, lehen puntu hori eskuratu ahal izateko.
Jaka-Zabaletak, aldiz, garaipen garbia eskuratu zuten igandean, Irribarria-Rezustari 5-22 irabazita. Lehen aldiz hartu du parte lizartzarrak txapelketa honetan, eta emaitza ikusita, zeresana emango duen bikotea izango dela dirudi.
Gaur arratsaldean Beotibarren jokatu da partidak itxi duen lehen jardunaldia. Artola-Imaz partida gehiena atzetik joan ostean, mendean hartu dituzte Laso eta Albisu. 22-18ko emaitzarekin amaitu dute lehen saioa.
AMEZKETAN AURREZ AURRE
Hurrengo jardunaldian, hau da, bigarrenean, eskualdeko bi pilotarik elkarren aurka jokatuko dute: Altuna III.ak eta Jakak. Amezketako Larrunarri pilotalekuan izango da partida hori, ostiral honetan, 22:00etan hasiko den jaialdian.
Artola-Imazek Olaizola II-Urrutikoetxearen aurka jokatuko dute Sorian, igandean. 17:00etan hasiko da jaialdia.
LEHENA, PEÑA II.ARENTZAT
Promozio mailan, lehen jardunaldian, Peña II-Arangurenek irabaztea lortu zuten Alberdi-Erasunen aurka, 22-15. Erasunek Salaverriaren ordez jokatu zuen partida hori.
Bestalde, Arteaga II-Urretabizkaiak galdu egin zuten lehen partida Agirre-Eskirozen aurka, 22-13.
BINAKAKO TXAPELKETA
1. Jardunaldia
Ezkurdia-Martija 22; Altuna III-L. Galarza 17
Irribarria-Rezusta 5; Jaka-Zabaleta 22
Artola-Imaz 22; Laso-Albisu 18
Hurrengo jardunaldia
Jaka-Zabaleta; Altuna III-L. Galarza
Olaizola II-Urrutikoetxea; Artola-Imaz
PROMOZIO TXAPELKETA
1. Jardunaldia
Peña II-Aranguren 22; Alberdi-Erasun 15
Agirre-Eskiroz 22; Arteaga II-Urretabizkaia 13
Hurrengo jardunaldia
Peña II-Aranguren; Agirre-Eskiroz
Arteaga II-Urretabizkaia; Alberdi-Salaverri