Jatekoa neurtzea, bizi estilo

Elikagaien xahutzea murrizteko helburuz, 'Egin on-On egin' kanpaina aurkeztu dute; besteak beste, jatetxeetan platerean utzitako jakiak etxera eramateko proposamena da.

Tolosaldeko herritar bakoitzak, urtean 179 kilo elikagai galtzen du, kontsumitu gabe; orotara, 8.500 tona dira eskualdean. Elikagaien xahutzea arazo bat gehiago da kontsumo ohituren, kutsaduraren eta, finean, berotze globalaren auzian, eta eskualdeko hainbat eragilek bat egin dute Egin on-On egin kanpainan, jatekoa neurtu eta elikagaien alferrikako xahutzea murrizte bidean.

Lehiberri zentroan eman dute ezagutzera egitasmoa, eta bertan izan dira, besteak beste, Gurutze Etxezabal Tolosaldea Garatzeneko lehendakaria, Josu Amilibia Tolosaldeko Mankomunitateko jarduneko lehendakaria eta eskualdeko hainbat ostalari. Guztiek ere bat egin dute Gurutze Etxezabalen hitzekin, egungo kontsumo eredua gizartearen funtsezko kezketako bat dela azpimarratzerakoan: «Gaur egun, natura babestea ez da hautu bat, betebehar bat baizik».

Bide horretan batu dira, bada, Tolosaldea Garatzen, Tolosa Gourmet, eta Tolosaldeko turismo enograstronomikoko klubeko ostalari zenbait, eta dinamika sinple bezain esanguratsua abiaraziko dute, Tolosaldeko Mankomunitatearen, Gipuzkoako Foru Aldundiaren eta Eusko Jaurlaritzaren laguntzaz: taberna eta jatetxeetako plateretan janaria uzten duten bezeroek, janari hori etxera eraman ahal izango dute, soberakinak erabiltzeko.

Helbururik behinena janari hondakinen inguruko hausnarketa sustatzea izango da, kontsumo ohituretan eraginez; 2030. urterako, Tolosaldeko elikagaien xahutzea erdira jaitsi nahiko lukete, herritar bakoitzaren batez bestekoa urteko 89 kilora murriztuz. Horretarako, bi egitasmo izango dira Egin on-On egin proiektuaren ardatz: Ez utzi ezer platerean, jatetxeetako soberakinak etxera eramateko proposamena, batetik, eta herritar nahiz ostalariek janaria behar bezala aprobetxatzeko ikastaroak, bestetik.

JAN GABEKOA, ETXERA

Elikagaiak neurriz kontsumitzeko helburura hamasei taberna eta jatetxe batu dira, momentuz, eta horien ardura izango da, bezeroek platerean utzitakoa ontzietan sartu eta bezeroei ematea.

Aipatu dutenez, Euskal Herrian hain ohikoa ez den ohitura hori erabat normala da hainbat herrialdetan, eta bide hori plastikorik gabe hartzeko hautua egin dute, kasu honetan: ostalariek PLA material %100 konpostagarriz eta biodegradagarriz eginiko ontzietan sartuko dituzte jan gabeko elikagaiak. Itxuraz plastikozko ontziak diruditen arren, errekurtso berriztagarriekin ekoitzitako landareetatik eratorritako materiala da PLA deiturikoa.

Horrela, beraz, ostalariek ontziak eskaintzeko ohituraren jabe egingo diren modu berean, herritarrak ere deitu dituzte, janaria ontzian jartzeko eskaera egiten ohitzera. Halaber, Egin on eta on egin kanpaina baliatu dute, kontsumitzaileei gomendio praktiko batzuk emateko: taberna eta jatetxeetan janaria neurrian eskatzea eta ahal den guztietan platereko guztia jatea.

Kontsumo ohiturak aldatzeko saiakera honetara atxiki diren establezimenduak honakoak dira: Aburuza sagardotegia, Alkizako ostatua, Astelena, Beti Alai, Botarri, Iriarte, Larraitz gain, Orexako ostatua, Route 33, Casa Julian, Casa Nicolas, Burruntzi, Ama, Ikatza, Orbela eta Lur-lan.

JANARIA ERE BERRERABILTZEN DA

Kanpainaren bigarren zutabea izango da pedagogiarena: ostalariei eta herritarrei jan gabeko soberakinekin plater berriak prestatzen irakastea.

Imanol Zubelzu sukaldariak eskainiko ditu bi ikastaroak, eta herritarrei bideratutako tailerreko izen-ematea zabalik da jada, 688 84 07 76an edo ugalde@tolosaldea.eus -en. Urriaren 30ean izango da, asteazkenez, Tolosako Zerkausi kaleko Sukal Talka espazioan, 18:00etatik 19:30era; 5 euroko prezioa izango du.

Egin on-On egin proba pilotu bat izango da, eta, proiektuaren emaitzak baloratutakoan, Tolosa Gourmet-eko ostalariekin abiarazitakoa eskualde osora zabaltzeko moduak aztertuko dituzte.

1/3

ELIKAGAIEN HERENA, ZABORRONTZIRA

Nazio Batuen Elikadura eta Nekazaritza Erakundeak emandako datua da honakoa: herritarren kontsumorako ekoitzitako elikagaien herena ez da sekula kontsumitzen, eta alferrik galtzen da. Janaria elikagaien prozesuaren etapa guztietan gertatzen da, gainera: ekoizterakoan, kontsumitzerakoan, banatzerakoan, saltzerakoan edo sukaldean prestatzerakoan.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!