Anoetako eta Irurako Udalek, UEMArekin elkarlanean, datorren ikasturterako euskara ikastaroak herrian bertan eskaintzeko baliabideak jarriko dituzte, beste urte batez. Matrikulatzeko azken eguna irailaren 24a izango da Iruran, eta 25a Anoetan.
Behe, erdi eta goi mailako euskara ikastaroak eskainiko dituzte, eta izena ematen dutenen artean, ordutegiak eta mailak kontuan hartuta, taldeak sortzeko aukera aztertuko dute bi herrien artean. Taldea sortzeko gutxieneko kopurura iritsiz gero, ikastaroak herri batean nahiz besteak eskainiko dira.
Urtero legez, ikastaro guztiak diruz lagunduko dituzte bi udalek. Herritik kanpoko ikastaroetan matrikulatzen diren herritarrek ere diru laguntzak jasoko dituzte.
Bi udaletatik azaldu dutenez, etorkinentzako ikastaroak sustatu nahi dituzte bereziki, eta aurten ere, iaz Anoetan aritu zen taldearekin jarraitzeko nahia erakutsi dute: astelehen, astearte eta ostegunetan, 15:00etatik 17:00etara.
Euskara jakiteak duen garrantziaz ohartarazi nahi dituzte herritarrak: «Beste urte batez, ahalegin berezia egin nahi dugu euskara ikasteko edo hobetzeko pausoa ematera anima daitezen».