Olaizola II.a eta Albisuk, Altuna III.a eta Rezustarekin neurtuko dituzte indarrak Donostia Hiria pelota feriaren lehen jardunaldian. Abuztuaren 27an izango da, gainerako partidak bezala, Atano III.a frontoian 22:15ean hasita. Jaialdi horretan jokatuko diren gainerako partidetan ere eskualdeko pilotariak ariko dira: lehenengoan Bakaikoa eta Erasun, Alberdi eta Urretabizkaiaren aurka; eta bigarrengoan Arteaga II.a eta Aretxabaleta, Laso eta Larunberen aurka.
Udako torneoetan estreinaldia egingo du Erik Jakak abuztuaren 28an. Zabaletarekin bikote eginda, Artola eta Mariezkurrena II.aren aurka jokatuko du partida Donostian. Eskualdeko bi pilotariak elkarren arteko lehian ariko dira.
Bi finalerdiak jokatu ondoren, antolatzaileek ez dute zehaztu oraindik noiz jokatuko den torneoaren finala. Hori bai, K Txakoli Pilota desafioaren berri eman dute. Buruz buruko finalaren errebantxa jokatuko dute Irribarria eta Urrutikoetxeak abuztuaren 28an, osteguna, 22:15ean Atano III.a pilotalekuan. Irabazleak 600 botila irabaziko ditu beretzat eta bere taldekideentzat.
Altuna III.a, Bilboko ferian
Bilboko pilota feriak iazko egitura bera izango du aurten ere, eta lau egunetan, Bizkaia torneoko finala eta Aste Nagusiko torneoaren finalerdiak eta finala jokatuko dira. Abuztuaren 20an izango da Bizkaia taldekako torneoko finala Oiz eta Anboto taldeen artean.
Aste Nagusiko torneoari dagokionez, lehen finalerdia Baikoko pilotarien artekoa izango da abuztuaren 21ean Olaizola II.a eta Mariezkurrena II.a, Urrutikoetxea eta Albisuren aurka ariko dira. Hurrengo egunean, abuztuaren 22an, Aspekoen finalerdiak jokatuko dira. Elezkano II.ak eta Zabaletak, Altuna III.a eta Rezustarekin neurtuko dituzte indarrak.
Bi finalerdietatik irabazle suertatzen diren bikoteekin jokatuko da finala feriaren azken egunean, abuztuaren 24an, gainerako jaialdi guztiak bezala, 18:00etan hasita.