Berastegiko Ameraunen ere prezipitazio maila neurtu dute eta ordubetean 17,3 litro ur pilatu dira. Goizaldean izan diren ekaitzetan tximistak erori dira eta Euskalmetek ordu eta erdian 4.000 deskarga zenbatu ditu, Araban, Bizkaian eta Gipuzkoan.
Ondorengo orduetan ezegonkortasunak gutxitzera egingo du, baina ekialdean oraindik zaparrada trumoitsuak botako ditu. Eguerdi inguruan giro lasaiagoa izango da, ostarteekin. Arratsaldean, ordea, litekeena da berriz ere zaparrada batzuk sartzea, batez ere hegoaldean. Hain zuzen, 15:00etatik 21:00etara, Abisu Horia dago ezarrita prezipitazio handiagatik. Ez da baztertzen txingorra egin dezakeenik.