Gizarte Segurantzako Institutu Nazionalak lanak eragindako gaixotasuna onartu dio 2018an minbiziaz hildako J.R.B.A. langileari. Langileak Fudike galdategian egin zuen lan, gaur egun Apatta industrialdean dagoena, Ibarran, eta garai batean Tolosan zegoena. Langileak 17 urte eman zituen bertan lanean.
CCOO sindikatuak eman du albistearen berri, eta esan du berak eskatu ziola ikerketa egiteko Osalani, langilearen izenean. “Osalani bere gaixotasunaren, biriketako kaltzinomaren, inguruko txostena egiteko eskatu genion, bere lanpostuarekin zerikusia ote zuen ikusteko. Langileak bere lana nola egiten zuen azaldu zuen eta antzeko gaixotasunak pairatu zituzten lankideen berri eman zuen. Langile horiek guztiak Tolosako lantokian aritu ziren lehenik, eta Ibarran gero”, esan du sindikatuak.
Osalanek ikerketa ireki zuenean, Fudike enpresak ezin izan zuen aurkeztu 2012 urte aurreko segurtasunari eta langileen osasunari lotutako dokumentaziorik, CCOO esan duenez. “Horregatik ezin izan da baieztatu enpresak Tolosako lantokiari lotuta ematen dituen segurtasun neurri egokien egiazkotasuna”. Ezin izan da ere zehaztu lantokian zegoen silikato hautsa zenbatekoa zen.
Osalan Ibarrako lantokira ere gerturatu zen eta ekoizpen gune bakarra dagoela baieztatu ahal izan zuen, eta bertan langile guztiak batera aritzen direla lanean, horiek horrela, langile guztiak daude silikatoarekin kutsatzeko arriskuan. “Hala ere, ez dira lanpostuetako neurketak egiten, nahiz eta badakiten langileen arrisku maila ez dela onargarria”. Osalaneko teknikoak, era berean, lantokia bisitatu zuen egunean aireztatze sistema bakarra dutela ikusi ahal izan zuen, eta egun horretan gainera, ez zuela aireztatzen.
Hori guztia kontuan hartuta, CCOOk dio, Osalaneko txostenak baieztatzen duela lantokian neurtutako silikatoa ez dela onargarria, eta ez dagoela kontrolpean, langileen segurtasun eta osasun eskubideak zapalduz.