Maialen Rodasek irabazi du 'Ez erretzeko zure arrazoiak' argazki lehiaketa

Tabakorik gabeko nazioarteko eguna da gaur eta Villabonako Errebote plazan egin dute sari banaketa ekitaldia. Horrekin batera herriko ikastetxeetako gazteek jokoak egin dituzte plazan, tabakoa kontsumitzeak dituen arriskuez sentsibilizatzeko.

Duela lau urtetik hona koordinatuta lanean ari dira eskualdean Gipuzkoako Minbiziaren Aurkako Elkartea, Amasa-Villabona eta Tolosako udalak, OSI Tolosaldea, Asuncion klinika eta Tolosaldea-Goierriko Osasun saila. Nerabezarorako Prebentzio Mahaiaren testuinguruan ekimenak sustatzen dituzte eta kanpainak martxan jarri.

Azken hilabetean Ez erretzeko zure arrazoiak lehiaketa abiarazi dute Instagramen. 40 argazki inguru jaso dituzte eta horietako gehienak gaur goizean ikusgai izan dira Errebote plazan. Maialen Rodas ibartarrak aurkeztutako lanak jaso du lehen saria. "Tabakoak gorputzean eragiten duen erreakzioa islatu nahi nuen argazkian eta beltza kolore indartsua, eta aldi berean zikina denez, puntu gogorra ere badu lan honek". 150 euroko txekea jaso du Rodasek.

Tolosaldean osasun arloan aritzen diren erakundeek, lehiaketa antolatzeaz gainera, tabakoaren eta kalamuaren kontsumoa murrizteko helburuarekin beste hainbat ekimen jarri dituzte martxan. Ikastetxeetan tailer hezitzaileak egin dira maiatzean, "Tabakoa-kalamua korapiloa" izenburupean. Nerabeei zuzendutakoak izan dira eta substantzia horiek kontsumitzeak eta edukitzeak zein ondorio dituen hausnartzeko balio izan dute.

Hain zuzen, Erniobea institutuko eta Zubimusu ikastolako DBHko hirugarren mailako ikasleak Errebote plazara gerturatu dira gaur eta ginkana batean parte hartu ahal izan dute. Amasa-Villabonako Udaltzaingoak hartu dute parte ekimenean eta substantzia hauek gainean eramanez gero, zer nolako isunak jaso ditzaketen azaldu diete gazteei. Osasun sailekoek berriz, tabako eta kalamuaren kontsumoak gorputzean uzten dituen ondorioak azaldu dizkiete. Ikasleek bertatik bertara tabakoak dituen osagaiak ezagutu ahal izan dituzte.

Maider Sierra, Gipuzkoako Minbiziaren Aurkako Elkarteko psikologoak azaldu duenez, "dependentzia honen inguruan erantzun bateratua ematea da gure nahia eta zerbitzu hobea eskaini nahi diegu erretzaileei".

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!